大行的崩潰與啟示 (2)

唉，蝕到咁都要人出post唱淡，你地要笑就笑啦。

一直我都認為美國既經濟早係今年年頭已經亮起紅燈，房價下跌對人民收入的影響要時間去顯露出黎，以美國人咁樣既消費習慣，一有d咩風吹草動，消費絕對係第一個出事。好在而家係一個全球化既社會，美國一個p左k，有其他國家既增長去抵銷。但是美國怎麼說也是世界最大的經濟體系，對世界各國仍然有著牽一髮而動全身的作用。

金融危機爆發之後，可以話以熊仔被收購做結果而告一段落。各國央行互相幫助，開晒印鈔機咁既樣，更加做左好多前所未有既事。其一就係你印錢唔夠快咩?唔緊要，我冇事都可以幫你印埋一份，你28日之後先還啦。再唔夠錢用，冇問題，我拎我d錢出黎幫你應急啊。大佬，我而家先知歐洲同埋瑞士央行既錢多到可以借出去lor，你地win晒。美國真係巴閉，有事仲可以搵其他人去擔起自己d債務。其次二呢，就係你問銀行借錢果時，唔使要擔保架，象徵性咁俾少少垃圾出去當做抵押，咁就可以借到幾百億番黎。聯儲局啊，使唔使做到咁盡架，連d垃圾都可以拎去借錢既話，有起事上黎係咪又係要成個美國去 孭飛。 有d更出奇既事就係，原來一間大公司破產既時候，係可以借錢去周轉既，大佬，你d credit rating點計啊，借錢既人真係有稔過會收得番既咩?咁樣既話，97果時點解南韓最大既集團，大友集團死果時，IMF又唔X理啊，真係美國人就大晒。總之呢幾樣非常唔合理既事就係因為大行自己pk，就令到全世界無啦啦入左經濟衰退啦。

死左一個市場，當然就去到另一個啦，華爾街炒人炒到飛晒天，下下都炒萬幾人，失業率就開始升啦，5.1%，而領取失業救濟金既人(冇錯，US係有D咁既野架)，亦都不斷上升。基本上成個消費市場已經危乎乎，樓價跌多少少都死。FED大量減息之後，基本上已經冇咩減息空間，再加上金融市場喘定左，下次議息應該可以只減25個基點。不過短期咁樣減息法，通脹都差唔多失去控制，弱美元既影響，唔單只係出口入口咁簡單，油價，金價呢D指標亦都不斷創新高。油價係俄羅斯同埋奈及利亞既陰影之下，應該唔會跌落去。

更大既問題係，對人生活有重大影響既糧食問題。美元弱，咩都升，米啊，菜啊呢D都不在話下架啦。唔單止美元既問題，呢段時間油價升得咁快，生物能源既開發已經刻不容緩。但係咁樣就會發生搶糧事件。食既要買，煉油既要買，做飼料既又要買，個個都買，想唔升都唔得啦。而糧食問題已經對好多國家造成政局不穩。最大消費國:菲律賓要實施措施，3年之內由入口國變出口國(最少都要收支平衡wor)，泰國呢D要限制出口都好正常。埃及方面既問題就比較大，因為之前先取消左對糧食既補貼，而家既米又咁貴，好多人係連米都買唔起，所以果邊都幾頭痛。強國? 唔使驚，有阿爺係度，好似話d儲藏量夠全國人食成個月，總之就唔使怕啦。

有人話既然usd咁樣跌法，我用hkd咪好蝕，轉晒做人仔先。咁稔冇錯既，反正未來都係美元弱而人仔強。不過，如果你d錢真係唔用既話，點解唔放落而家好似係唯一"冇俾次按影響到"既經濟體系，歐盟呢?咁既稔法係因為之前好似聽過人仔係對外升值而對內貶值。再加上強國而家有一定既危險，好似通脹啊(近期好左少少)同埋資產bubble呢d咁。如果你真係夠膽去轉人仔，點解唔轉去歐元呢。再稔稔，咁點解唔去買其他更高息既貨幣呢?

又離左題tim，講番us，其實好多公司既第1季業績已經出左，當然有不少出人意表既結果啦。銀行要write down已經大家都知，跌都費事。比較有睇頭既係科技股，佢地既表現都好硬，利潤可以升20-30%，好似Google啊，AT&T啊，呢d，所以IBM同Apple既report都應該有保證。但係一d比較貼近人民生活既公司就開始話俾你地知，唔好咁開心住。強如老麥，係us都要負增長，以老麥係us既地位，會有咁既結果真係幾驚訝，可能說明左美國人已經開始節省消費。岩岩又話左美國果邊既樓價都跌啊跌啊咁跌左幾個月，唔知班老美可以頂到幾耐呢。老美一cut消費，唔只us既公司會死，好似印度咁，以外包服務最為強勁，年年都有雙位數字既增長。但係今個月既outsource service增長竟然有負
數，我自己就認為唔係太好。其實，美國又真係好彩既，今年係大選年，薯仔一定點都頂住個市架，跌唔落都係正常既。

買升睇升，買跌睇跌，data係客觀既，但係睇既人就一定唔係，所以唔同人睇到唔同既野好正常。到底而家係唔係熊二，我都唔知道。不過呢期強國好似同美國夾埋咁，一個升一個跌，一個跌一個升。而家美國開始又跌既時候，強國終於忍唔住要出手救市，阿爺啊，你減追證券印花稅咪只會令更多人去炒股。算啦，我唔理啦，熊仔，頂住啊!